ӨРХИЙН АМЬЖИРГААНЫ ЧАДАВХИЙГ ДЭМЖИХ ҮНДЭСНИЙ ХОРООНЫ ДҮРЭМ
ӨРХИЙН АМЬЖИРГААНЫ ЧАДАВХИЙГ ДЭМЖИХ ҮНДЭСНИЙ ХОРООНЫ ДҮРЭМ
Нэг.Нийтлэг үндэслэл
1. Энэхүү дүрмийн зорилго нь Өрхийн амьжиргааны чадавхийг дэмжих Үндэсний хороо /цаашид "Үндэсний хороо" гэх/-ны зохион байгуулалт, бүрэн эрх, үйл ажиллагааны зарчим, тус хорооноос ядуурлыг бууруулах асуудлаар нутгийн захиргааны болон дотоод, гадаадын байгууллагатай ажиллахтай холбогдсон харилцааг зохицуулахад оршино.
2. Үндэсний хороо нь "Өрхийн амьжиргааны чадавхийг дэмжих Үндэсний хөтөлбөр" /цаашид "хөтөлбөр" гэх/-ийг хэрэгжүүлэх ажлыг улсын хэмжээнд зохицуулах, нэгдсэн удирдлагаар хангах, хяналт тавих, биелэлтийг нь хангуулах, ядуурлыг бууруулах болон хөтөлбөрийн үйл ажиллагаанд оролцохыг эрмэлзсэн төрийн болон төрийн бус байгууллага, аж ахуйн нэгж, иргэдийн үүсгэл санаачилгыг дэмжих, тэдгээрийн ядуурлыг бууруулах чиглэлээр хийж буй ажлыг уялдуулан зохицуулах, хэрэгжүүлэхэд дэмжлэг үзүүлэх чиг үүрэг бүхий орон тооны бус байгууллага мөн.
Хоёр.Үндэсний хорооны удирдлага, зохион байгуулалт, бүрэлдэхүүн
3. Үндэсний хорооны бүрэлдэхүүнийг Засгийн газраас батлах бөгөөд уг хороо нь хөтөлбөрийн хэрэгжилтийг Засгийн газрын өмнө хариуцна.
4. Үндэсний хорооны бүрэлдэхүүнд төрийн байгууллагаас гадна эрдэм шинжилгээ, судалгааны болон төрийн бус байгууллагын төлөөлөгчдийг оролцуулна.
5. Үндэсний хорооны бүрэлдэхүүнд төрийн бус байгууллагаас 3 төлөөлөл байх бөгөөд эдгээр байгууллага нь жил бүр ээлжлэн солигдох зарчмаар ажиллана. Төрийн бус байгууллагын төлөөллийг Үндэсний хороо шийдвэрлэнэ.
6. Үндэсний хороо нь улирал тутам нэгээс доошгүй удаа хуралдах бөгөөд ээлжит бус хуралдааныг хорооны дарга зарлан хуралдуулж болно.
7. Үндэсний хорооны хуралдаан гишүүдийн ердийн олонхи хүрэлцэн ирснээр хүчин төгөлдөрт тооцогдох бөгөөд асуудлыг хуралдаанд оролцсон гишүүдийн ердийн олонхийн саналаар шийдвэрлэнэ. Санал тэнцсэн тохиолдолд асуудлыг хуралдаан даргалагчийн саналаар шийдвэрлэнэ.
8. Үйл ажиллагааныхаа хүрээний асуудлаар Үндэсний хороо нь тогтоол гаргана.
9. Үндэсний хорооны ажлын албаны үүргийг Өрхийн амьжиргааны чадавхийг дэмжих хөтөлбөрийн газар гүйцэтгэнэ.
10. Үндэсний хорооны хурлаар хэлэлцүүлэх асуудлын төсөл нь урьдчилан нийгмийн хамгаалал, хөдөлмөрийн асуудал эрхэлсэн Засгийн газрын гишүүнээр хянагдаж зөвшөөрөгдсөн байна.
Энэхүү шаардлагыг хангаагүй асуудлыг Үндэсний хорооны хурлаар хэлэлцэхгүй.
11. Үндэсний хороо нь тогтоосон журмын дагуу тэмдэг, албан бичгийн хэвлэмэл хуудас хэрэглэнэ.
Гурав. Үндэсний хорооны бүрэн эрх
12. Үндэсний хороо нь дор дурдсан үүрэгтэй байна:
а/хөтөлбөрийн хүрээнд жил бүр хэрэгжих арга хэмжээний тодотгосон төлөвлөгөөг хийж, эдийн засаг, нийгмийг хөгжүүлэх тухайн жилийн үндсэн чиглэл, улсын төвлөрсөн төсөвт тусгуулж санхүүгийн эх үүсвэр /гадаад, дотоод/-ээр хангуулах ажлыг зохион байгуулах;
б/хөтөлбөрийн хэрэгжилт, үр дүнг хянаж холбогдох тодотгол, өөрчлөлт оруулах;
в/Ядуурлыг бууруулах нэгдсэн сангаас аймаг, нийслэлийн Ядуурлыг бууруулах санд оруулах хөрөнгийн жил, улирлын хуваарийг хэлэлцэн шийдвэрлэх;
г/хөтөлбөрийг хэрэгжүүлэхэд зориулан улс, орон нутгийн төсвөөс олгосон хөрөнгө, дотоод, гадаадын хандивлагчдын зээл, тусламжийн зарцуулалт, ашиглалтад хяналт тавих, дэд төслүүдийн хэрэгжилтийг хангуулах талаар шаардлагатай арга хэмжээг авч шуурхай удирдлагаар хангах;
д/Ядуурлыг бууруулах нэгдсэн болон дэд сангийн үйл ажиллагааг уялдуулах;
е/Өрхийн амьжиргааны чадавхийг дэмжих хөтөлбөрийн газар, аймаг, нийслэл, сум, дүүргийн Өрхийн амьжиргааны чадавхийг дэмжих зөвлөлийн ажлын тайлан, хөтөлбөрийн хэрэгжилт, үр дүн, сангийн хуваарилалт, ашиглалт, зарцуулалтын байдлыг хэлэлцэж холбогдох арга хэмжээ авах;
ж/Өрхийн амьжиргааны чадавхийг дэмжих хөтөлбөрийн газар, аймаг, нийслэл, дүүргийн Өрхийн амьжиргааны чадавхийг дэмжих зөвлөлийн нарийн бичгийн дарга нарын цалингийн сан, үйл ажиллагааны зардлын төсвийг хянаж, Санхүү, эдийн засгийн яамаар батлуулах;
з/хөтөлбөрийн хэрэгжилт, түүний үр дүнгийн талаар Засгийн газар, хандивлагч орнууд, олон улсын холбогдох байгууллагад тайлагнах;
и/ядуурлыг бууруулах чиглэлээр асуудал дэвшүүлэх, хандивлагч орон, олон улсын байгууллагатай гэрээ, хэлэлцээр байгуулахад санал өгөх, ажлаа салбарын яамдын бодлоготой уялдуулах;
к/хөтөлбөрийг хэрэгжүүлэхэд Засгийн газрын болон төрийн бус байгууллага, хувийн хэвшлийн аж ахуйн нэгж, иргэдийг өргөн оролцуулах боломжийг бүрдүүлэх, тэдгээрийн оролцоог нэмэгдүүлэх арга хэмжээ авах.
13. Үндэсний хороо нь дор дурдсан эрхтэй байна:
а/Ядуурлыг бууруулах сангийн хөрөнгийг хуваарилах, захиран зарцуулах, хяналт тавих;
б/ядуурлыг бууруулах сангаас холбогдох төслийг санхүүжүүлэх дүрэм, зааврыг батлах;
в/Өрхийн амьжиргааны чадавхийг дэмжих хөтөлбөрийн газар, аймаг, нийслэл, сум, дүүргийн Өрхийн амьжиргааны чадавхийг дэмжих зөвлөлөөс иргэдийн санал, гомдлыг хүлээн авч шийдвэрлэж байгаа байдалд хяналт тавьж, холбогдох арга хэмжээ авч хэрэгжүүлэх;
г/үйл ажиллагааны хүрээнд шаардагдах мэдээ, судалгааг холбогдох яам, агентлаг, нутгийн захиргааны байгууллагаас гаргуулан авах;
д/орон нутгийн зөвлөл, Өрхийн амьжиргааны чадавхийг дэмжих хөтөлбөрийн газрын дүрэм, жилийн ажлын төлөвлөгөөг батлах;
е/нийгмийн хамгаалал, хөдөлмөрийн асуудал эрхэлсэн Засгийн газрын гишүүнтэй зөвшилцөн хөтөлбөрийн газрын захирлыг томилох, чөлөөлөх.
