СОЁЛЫН ТӨВИЙН ТАНИЛЦУУЛГА
Байгууллагын эрхэм зорилго:
Сумын нийт иргэд хөдөлмөрчид, хүүхэд багачуудын дунд урлаг соёлын олон талт арга хэмжээг зохион байгуулж соёлын биет бус өвийг өвлөн уламжлуулж, ардын авьяастнуудыг тодруулан, үйлчлүүлэгчдийн үйлчилгээний орчинг ая тухтай байлган ажиллахыг эрхэм зорилгоо болгон ажиллана.
Байгууллагын алсын хараа:
Соёлын төв нь үйлчилгээний өргөн хүрээтэйгээр ажиллаж , ажилчин албан хаагчдаа мэргэшүүлэх олон талт сургалтуудад хамруулж чадварлаг боловсон хүчинтэйгээр иргэд олон нийтэд соёлын үйлчилгээг хүргэж, бүс болон аймгийн чанартай уралдаан тэмцээнүүдийг төрийн болон төрийн бус байгууллагуудтай хамтран зохион байгуулж сумдуудаа манлайлан ажиллахыг эрмэлзэнэ.
Тус суманд 1959 онд иргэд хөдөлмөрчдөд нам засгийн бодлого шийдвэрийг сурталчлах, соёл урлагийн үйлчилгээ үзүүлэх үндсэн чиг үүрэгтэй “Улаан булан” нэртэй соёлын байгууллага байгуулагдаж анхны Эрхлэгчээр нь Сэр-Од хэмээх хүн ажиллаж байсан бөгөөд улмаар 1963 онд Клуб нэртэй болж, Номын сангийн үйл ажиллагаа явуулж, 2 орон тоотой болон өргөжсөн. Номын сангийн Эрхлэгчээр Ш.Дашдаваа, Клубын Эрхлэгчээр Хадаагийн Тогооч нар ажиллаж байжээ. Соёлын байгууллага нь ажлын цар хүрээ болон ажиллах хүчээ нэмэгдүүлэн 1991 онд Соёлын төв нэртэй болж, 2007 оноос Эрхлэгч, Бүжгийн багш, Хөгжмийн багш, Номын санч, Нярав гэсэн үндсэн 5 орон тоотой болсон.Сумын Соёлын байгууллагын Эрхлэгчээр н.Сэр-Од, Х.Тогооч, Ш.Адъяадорж, МУСТА н.Лувсан-ням, Б.Доржготов, Г.Лантуу, МУСТА Ж.Сосорбарам, МУСТА Б.Шинэцэцэг, Улсын Тэргүүний уран сайханч Т.Доржпалам, н.Энхболд, н.Алтанцэцэг, Ж.Болормаа, Ж.Энхжаргал, Г.Туулцэцэг, Г.Батчулуун,П.Бямбасүрэн, Ц.Эрдэнэтулга, М.Нарандэлгэр, Б.Асралмаа, Т.Дарь Эхсүрэн нар ажиллаж байсан бөгөөд, 2018 оноос 21 дэхь эрхлэгчээр Доржготовын Туулхишиг ажиллаж байна. Соёлын төв нь: 2015 оны 01 дүгээр сард 250 хүний суудалтай шинэ барилга ашиглалтанд орж 5 дахь жилдээ үйл ажиллагаагаа явуулж байна.Соёлын байгууллагын хамт олон сумын иргэд хөдөлмөрчдөд соёл, урлагийн болон олон нийтийн үйл ажиллагааг тасралтгүй хүргэхийг эрхэмлэн ажилладаг бөгөөд зохион байгуулж байгаа соёл урлагийн болоод, бусад үйл ажиллагаанд хамрагдагсдын тоо жил ирэх тусам өссөн үзүүлэлттэйгээр явж байгаа нь бидний ажлын амжилт байдаг юм. 2022 оны байдлаар Эрхлэгч, Бүжгийн багш, Хөгжмийн багш, Номын санч-архив бичиг хэргийн ажилтан, Музей,Соёлын өв хариуцсан ажилтан-Нярав, Үйлчлэгч-манаач, Манаач-сантехникч гэсэн 7 орон тоотой үйл ажиллагаагаа явуулж байна.
