ӨНГӨТ БАГ
Даланжаргалан сумын “Өнгөт баг” нь нийт 107,5 кв.м газар нутагтай, засаг захиргааны хувьд нутгийн өөрөө удирдах ёсыг Иргэдийн нийтийн хурал, түүний тэргүүлэгчид, төрийн удирдлагыг багийн засаг дарга хэрэгжүүлэн ажилладаг.
Тус баг нь нутгийнхаа баруун талаараа, баруун хойд талаараа Элдэв багтай, зүүн хойд, хойд талаараа Хэнтий аймгийн Дархан, Бор-Өндөр сум, зүүн урд зүүн талаараа Айраг сумтай тус тус хиллэдэг.
Баг нь 72672 толгой малтай, үүнээс тэмээ- 469, адуу-3545, үхэр – 2906, хонь -38927, ямаа- 26825 толгой байна.
Ан амьтаны хувьд: тарвага, үнэг, чоно, хярс, зээр, аргаль, янгир зэрэг олон төрлийн ан амьтадтай. Ургамлын хувьд цөлөрхөг хээрийн бүлгэмдэл зонхилно. Шарилжны төрлийн ургамлууд түгээмэл тохиолддог ба үүнээс хамгийн элбэг болох шаргал шарилж, олон зүйлийн цэцэгт ургамлаар баялаг, өнгийн чулуу ихтэй.
- Өнгөт багийн хүн ам зүйн байдал:
Өнгөт баг нь 180 өрх, 480 хүн амтай, үүнээс эрэгтэй-244, эмэгтэй-236, 0-15 насны 144, 16-59 насны -288, 60-дээш настай өндөр настан -48 хүн амын 11,6 хувь нь сумын төвд амьдардаг.
Одоо тус багт 1989 оны Улсын аварга малчин, 2022 оны “Гавьяат малчин” Ш.Бат-Очир, Ардын Их Хурлын Депутат, 1986 оны Улсын аварга малчин Г.Ичинхорлоо, 1987 оны Улсын аварга тууварч малчин Г.Тогтохжаргал, Монгол Улсын Ардын Их Хурлын депутат, 1985 оны Улсын аварга малчин, сайн уяач асан Д.Өлзийхутагийн гэргий Ц.Улаанхүүхэн нарын өндөр настан ахмадууд хойч үедээ үлгэрлэн ажиллаж амьдарч байна.
